नेपाली हास्यव्यङ्ग्य अनलाइन पत्रिका

यति वेला साँढेहरू
चौबाटोमा उभिएर
एक अर्कोलाई लखेट्दै हुँकारिरहेछन्
एक अर्कोलाई तर्साउँदै डुक्रिरहेछन्
र किसानको बाली हसुरिरहेछन्
र किसानको खेतबारी खोस्रिरहेछन् !

धेरै वर्षदेखि
गरीबको बाली खान पल्केका
गरीबको परिश्रम ध्वस्त पार्न सल्केका
यी ठूला ठूला साँढेहरू
यति वेला
सिङ तिखारेर
सोझा बाच्छाहरूलाई तर्साइरहेछन्
सोझा बाच्छाहरूलाई लखेटिरहेछन् ।

निरीह बाच्छाहरू
विवश छन् शोषण सहन
बाध्य छन् पीडा खप्न ।

यतिवेला साँढेहरू
मुखुण्डो लगाएर
बुख्याँचाहरूको परेड हेर्दै
खित्का छोडेर हाँसिरहेछन् ।

यति वेला साँढेहरू
लाखेको जामा लगाएर
मुर्कटाहरूको गीत सुन्दै
ताण्डव नृत्य गरिरहेछन् ।

यति वेला साँढे पीडित बाच्छाहरू
साँढेहरूको चर्तिकला देखेर
आश्चर्यचकित हुँदै
आफैसँग प्रश्न गर्न वाध्य छन्-
कहिले होला साँढेमुक्त यो चौबाटो ?
कहिले होला साँढेमुक्त यो खेतबारी ?

०००
काठमाडौं