नेपाली हास्यव्यङ्ग्य अनलाइन पत्रिका

थोत्रा चप्पलमा सुटुक्क पहिले यो राजधानी पसे
नाना जाल र झेल साथ लफडा ताना चलाई बसे
भेट्टाए पद राजनीति तिरको बुन्दा महाजाल जो
जङ्गी कानुनदेखि माथि अहिले नेता छ नेपालको ॥१

निल्छन् शङ्करले हलाहल सरी उत्कोच कालो पनि
गर्छन् आपसमा ठुलो कलह रे मिल्छन् छिनैमा अनि
पार्छन् वैभव झन् सिकार यिनले माछो सरी जालको
जङ्गी कानुनदेखि माथि अहिले नेता छ नेपालको ॥२

भारी शान कुबेरको छ सबको जोडेर जेथा धन
हत्याए जसले ठुला पद गरे भण्डारको उल्झन
पेवातुल्य भँडार नै हुनगयो खाँचो छ के मालको
जङ्गी कानुनदेखि माथि अहिले नेता छ नेपालको ॥३

चिल्ला कार करोडमाथि सुविधा छन् वायुपङ्खी अनि
इच्छा माफिक डुल्छ यो मुलुकको मेची र काली पनि
सामन्ती सुविधा छ उच्च जसको सम्राटको चालको
जङ्गी कानुनदेखि माथि अहिले नेता छ नेपालको ॥४

आशिर्वाद छ माथि माथि गुरुको देशी विदेशी सब
पार्दा बन्धक छुट मिल्दछ सधैँ यो राष्ट्रको गौरव
घाती केस सबै बिलाउँछ यहाँ छोपी सदा काल जो
जङ्गी कानुनदेखि माथि अहिले नेता छ नेपालको ॥५

०००
भक्तपुर