नेपाली हास्यव्यङ्ग्य अनलाइन पत्रिका

देवीप्रसाद मिश्र

मेरी सुभानी गणतन्त्र रानी
माया हरायो किन आज नानी
साटेँ सफा प्रेम सुसभ्य ठानी
अर्कै बनायौ तर आज बानी !!१॥

बोकेर ल्यायौ मनमा तरङ्ग
छाडेर जाँदा म भएँ भरङ्ग
छल्दै नजाऊ पर हे शिवानी
भन्लान् सबैले अब बेइमानी ॥२॥

छन् साथ हाम्रा गतिला कहानी
सद्भाव राखेर सुधार बानी
आऊ थलामा अझ हर्ष मानी
राम्रो उदाओस् सँगमा बिहानी ॥३॥

सम्झी कहानी अझ चित्त मेरो
मेची र काली तिर मार्छ फेरो
बाँझो छ हाम्रो सब खेतबारी
आऊ प्रिये स्वच्छ दिमाग पारी !!४!!

जन्ती गएका बरियाँत सारा
भन्छन् भएछौ अब कर्महारा
सम्हाल्न थालौँ घरबार हाम्रो
सत्कर्मले जीवन बन्छ राम्रो ॥

छर्दै सदा पौरख यी गरामा
साटौँ खुसीका पल यो थलामा
आऊ यता भाग्नु हुँदैन रानी
जाला नजान्दा सब जिन्दगानी ॥६॥

०००
ताप्लेजुङ, हाल- काठमाडौं
२०८०/२/१५