नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

जात्रा लाग्छ यहाँ के नेपाली धन खायो
कात्रो माग भयो रे पालोमा ऋण खायो
डालोमा सटही भै ढोकामा गुँड लायो
भाडाका भरिया छन् आफै लाज लजायो ।१

टाढाका जन ढोग्दै धामा गर्न लगायो
आफ्ना यी जन ढाँट्दै भारी बोक्न लगायो
आमाको मन भाँड्दै चोरी गर्न लगायो
मुर्दावाद फलाक्दै आफै लाज लजायो ।२

सत्ताको मद लाग्दा कस्तो मात चढायो
भुत्ते सांसद भुक्दा पैसा मात्र बढायो
झोलेले पद किन्दै कस्तो नीति बनायो
गुण्डाले घर धान्ने यस्तो चाल चलायो ।३

लुच्चा लोफर टोले जम्मा गर्न लगायो
ठेक्कामा कर लायो थैलो भर्न सघायो
मान्छे तस्कर आफ्ना जोगायो र लुकायो
खै संस्कार यहाँको भाषा खान लगायो ।४

साँच्चै पत्कर जुटदा खानी बेच्न पठायो
भ्रष्टाचार समेट्दै छापा हान्न लगायो
पापाचार बटुल्दै खापा छेक्न पठायो
आलो रक्त हसुर्दै धर्ती शून्य बनायो ।५

बोरामा सुन आयो उल्टो जाँच गरायो
जुम्ला नून बिनाको भोको बाघ जनायो
सस्तो हुन्छ रडाको पोको पार्न लुकायो
भेंडा थुन्न नसक्ने डोको बुन्न लगायो ।६

०००
नवलपुर