राम राम ! हरे राम !!
लुटमाथि लुट छ, कहाँ छ यस्तो ठाम ? जसलाई सज्जन ठान्यो, उही छ हराम मुखुण्डोधारी तस्करहरूको खोई बदनाम ? नेपाली जपिरहु सधैँ राम राम ! हरे राम !!
दिव्य गिरी :
जहाजमा उडेर आउँछ सुन धमाधम
सुन नपक्रने भ्रष्ट जाँचकीको के काम ?
अख्तियारमा अनेक अनेक काण्डको जाम
नेपाली जपिरहु सधैँ राम राम ! हरे राम !!
कोही भने खाताराम, कोही दाताराम
भ्रष्ट मन्त्री र सचिवको बैंकमा दामैदाम
भुटानी शरणार्थी काण्डमा किन छलछाम ?
नेपाली जपिरहु सधैँ राम राम ! हरे राम !!
बिहान बिहान सुन्नुपर्ने भ्रष्टहरूकै नाम
लुट्ने मात्र हो भने राजनीतिको के काम
पाप पखाल्न तीर्थ छन्, जाऊ चारधाम
नेपाली जपिरहु सधैँ राम राम ! हरे राम !!
नेता गर्ने कालो काम स्वास्नी बुझ्ने खाम
कोही भने मस्तराम, कोही सीताराम
भ्रष्टाचारमा रमाउने नेताको के काम ?
नेपाली जपिरहु सधैँ राम राम ! हरे राम !!
लुटमाथि लुट छ, कहाँ छ यस्तो ठाम ?
जसलाई सज्जन ठान्यो, उही छ हराम
मुखुण्डोधारी तस्करहरूको खोई बदनाम ?
नेपाली जपिरहु सधैँ राम राम ! हरे राम !!
०००
काठमाडौं