नेपाली हास्यव्यङ्ग्य अनलाइन पत्रिका

ओम नरहरि श्रेष्ठ :

घाँटी निमोठेको थाहा छ
मुन्टो चुसेको पनि थाहा छ
कन्याजाली फटाएको पनि थाहा छ
तर भन्नु हुँदैन
किनभने मसँग प्रमाण छैन ।

जूस खाएको थाहा छ
भूस खाएको पनि थाहा छ
घूस खाएको पनि थाहा छ
तर भन्नु हुँदैन
किनभने मसँग प्रमाण छैन ।

फटाहाले खाएको थाहा छ
फाँटवालाले खाएको पनि थाहा छ
फैसला गर्नेले खाएको पनि थाहा छ
तर भन्नु हुँदैन
किनभने मसँग प्रमाण छैन ।

जुटेको थाहा छ
फुटेको पनि थाहा छ
लुटेको पनि थाहा छ
तर भन्नु हुँदैन
किनभने मसँग प्रमाण छैन ।

मान खाएको थाहा छ
सम्मान खाएको थाहा छ
विमान खाएको पनि थाहा छ
तर भन्नु हुँदैन
किनभने मसँग प्रमाण छैन ।

सेल खाएको थाहा छ
रेल खाएको थाहा छ
एनसेल खाएको थाहा छ
तर भन्नु हुँदैन
किनभने मसँग प्रमाण छैन ।

जताततै दुर्योधन मात्र देखिने
धृतराष्ट्रले
आत्मदाह गरेको
दृश्य पनि देखिएन
प्रमाणको आदेश भएछ ।

०००
मध्यपुर थिमि
९८४१—३८८८११