नेपाली हास्यव्यङ्ग्य अनलाइन पत्रिका

प्रचण्ड भास्कर :

पुस्तौंदेखि
चलिरहेछ
अस्तित्वको
एक भयानक युद्ध !
न यता, न उता,
जस्ता,
नातागोताहरु जताततै छन
र जिस्क्याइरहन्छन बेला बेला !
तिनीहरुलाई लाग्छ,
हामीसँग तिनीहरुको
दम्भ भङ्ग गर्ने कुनै भेद छैन !
उनी बिर्सिन्छन् कि !
हामी त आमाको गर्भबाटै
गर्व बोकेर आएका मान्छे !
हामी नजन्मिँदै यहाँ
जन्मिसकेको थियो स्वाभिमान !
हाम्रो आँखा नखुल्दै
बुद्धले खोलिसकेका थिए
अशान्तिको मुख !
ती नातेदारजस्ता देखिने
नाट्यदारले सधै सबै मेरै हो भनिरहे !’
बुद्ध आफ्नै भनिरहे,
सीता आफ्नै भनिरहे,
मधेश आफ्नै भनिरहे,
लिपु आफ्नै धुरा आफ्नै,
टिष्टादेखि काँगडासम्म,
पानीदेखि माटोसम्म सबै
आफ्नै हो भनिरहे ।
उसलाई त,
यो पनि आभास छैन कि,
जुन सागरको नुन उसले खाइरहेछ
त्यसमा पनि हाम्रै पुर्खाको पसिना मिसिएको छ ।
उसलाई त,
आफ्नो सिमाना
बचाउन समेत हामी नै चाहिन्छ ।
अनि, किन उसले हाम्रो सिमानामा नानाथरी
गरिरहन्छ ।
होलान् केही
उसले बजाएको
बाँसुरीमा नाँच्नेहरू
सत्यको आँखा,
हामीले नकराउँदै बन्द
गरिसकेका थिए तर,
अब धेरै बेर छैन- उनीहरुलाई रिङ्गटा लाग्न !
उसले सत्तामा खुवाएको
भत्ताको पत्तासाफ
हुने बेला हुँदैछ ।

स्मरण रहोस् उसलाई !?
नियालीरहेछ
सगरमाथाले संसारका
सबै अग्ला मनमानीहरू
र पर्खिरहेछ उग्रताको चरम सीमा,
ताकी भत्काउन सकोस् ती दम्भहरूको उचाई !!

०००

कञ्चनपुर