नेपाली हास्यव्यङ्ग्य अनलाइन पत्रिका

हरिप्रसाद पौड्याल :

औधी जाडो पौषको मासबाट
घट्तै आयो सूर्यको उच्च ताप
मोटा बाक्ला वस्त्रको भाउ चर्को
छैनन् न्याना रङ्कका लागि बर्को ॥१

बस्ने यौटा झोपडी छैन सानो
भोका नाङ्गा छन् यहाँ छैन दानो
मागी खाने बाध्यता हेर कस्तो
गर्छन् हेला दानवी चाल जस्तो ॥२

माघे जाडो खप्न गाह्रो छ हेर
चल्दा हावा रातमा ओस धेर
भोकै-नाङ्गै दुःखले रात काट्छन्
औधी पीडा रोगले दीन मर्छन् ॥३

पैसावाला गर्दछन् मात्र हाँक
भोका नाङ्गा पर्दछन् बिल्लबाठ
नेता हाम्रा भाषणै मात्र गर्छन्
चिल्ला गाडी यानमा सैर गर्छन् ॥४

झन्डै झन्डा देशमा देख्छु राता
को देला खै शीतमा वस्त्र ताता
फाल्छन् कोही अन्नको देख्छु रास
मर्छन् भोका भोककै हुन्छ त्रास ॥५

को होला खै दीनको दुःख देख्ने
बाक्ला न्याना वस्त्रले आङ ढाक्ने
देला कस्ले पेटमा टम्म खान
को रोक्ला खै दीनको प्राण जान ॥६

०००
धुलाबारी, झापा