नेपाली हास्यव्यङ्ग्य अनलाइन पत्रिका

हरिप्रसाद पौड्याल :

आई पराई सडकै बनाए
ताली बजाई उधुमै रमाए
गाडी र घोडा पनि पो कुदाए
हाम्रा त साँच्चै किन हो निदाए ।१।

कुर्सी छ प्यारो यिनको त आज
भूभाग मिच्ता पनि छैन लाज
लामो छ निद्रा सपना सचित्र
बाँडेर बस्छन् रमिता विचित्र ।२।

पल्किन्छ ढाडे तर चाट्न पाई
ढाडै नभाँचे अब हुन्न भाइ
मेची र काली सब उठ्नु पर्छ
माटो मिचेमा मुटु दुख्नु पर्छ ।३।

हौँ वीर हामी किन झुक्नु पर्ने ?
मीठा कुरामा किन बिक्नु पर्ने ?
पुर्खाहरूको बलिदान सम्झी
ज्यानै गुमाऔँ तर हुन्न धम्की ।४।

माटो र पानी जनजिन्दगानी
आधार हाम्रा हिम शैल खानी
तिघ्रा कमाई पछि लुक्नु हुन्न
उठौँ जुरुक्कै अब सुत्नु हुन्न ।५।

०००
धुलाबारी, झापा