नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

कमायो भने छेउमा पर्छ बोल्न
रमायोसँगै ऊ कुनै दाउ पार्न
हुँदा दीनतामा कुनै आउँदैन
भए अर्थ मेरा त्यही भो सपार्न ।१

यहाँ अर्थले अर्थ खोज्ने जमाना
झिँगा भन्किने गर्दछन् चारमाना
यही ठान्छ राम्रो यहाँको समाज
रुपैयाँ रूपैयाँ फलेको दिमाग ।२

दिवा रात सन्ध्या यही स्वप्न देख्ने
न नाता न आफ्नो कहीँ त्यो नदेख्ने
यही मुख्य बाटो भनेको छ सारा
कमाऊँ कहाँ दोबरी पार्न देख्ने ।३

ग-यो काम कस्तो न लेखा छ हाम्रो
छ सम्पत्ति धेरै जहाँ जो छ राम्रो
छ हालीमुहाली दलालीहरूको
बजे बाँसुरी आज त्यस्तैहरूको ।४

बने कृष्ण त्यस्तै तिनै आज राम
छ ताली तिनैको बढो धूमधाम
यहाँ ठान्दछन् यो सही योग्य- मान
म ता ठान्छु त्यस्ता सबै हुन् हराम ।५

०००
खोटाङ