नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

छैन औकात नै देखियो चाहियो
काजु- सौगात रे चाहियो चाहियो
जे हिजो पाक्दथ्यो त्यो खुशी नै थियो
भाइटीका हिजोको हरायो गयो ।

डीउ रक्सी छुसी विदेशी चाहियो
फूल छन् कागजी बेचिने चाहियो
सुन्तला कागती झन् मिठा अम्बक
हुन्न रे गाउँका बाहिरी चाहियो ।

छैन गोदावरी मख्मली बाबरी
खै थुँगे ज्ञान्थुँगा गाउँका नम्बरी
बाहिरी फूल छन् गाउँमा लाहुरे
बाह्य सामानले गाउँले चाउले ।

देउसी छोडियो भैलिनी छोडियो
नाँच डिस्को भयो मादले छोडियो
नव्यको नाउँमा दुर्गन्धी पारियो
लोकबाजा न छन् बाँसुरी मासियो ।

भाँडभैलो कुरा भित्रियो देशमा
पाउमा हातमा राहुको भेषमा
जो नराम्रो सही हुन्छ त्यो स्वीकृत
चाड नै देखियो आज ता विकृत ।

०००
खोटाङ