नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

ठगका पदमा शिर पार्दछ जो
गतिलो पनि हुन्छ त्यही बलियो
ठगको जसबाट अनादर भो
डिलमुन्तिर पर्छ सदैव अहो !१

ठगको मतियार हुँदा अहिले
घुस खान दिने सुन बोक्न हुने
पदमान हुने गौसरि त्यो दुहुने
ठग बन्नु निको जहिलेतहिले ।२

दलमा गठमा सब ठाउँ दिने
धनदौलथको सुविधा रहने
यति योग्य कला कसरी नसिकूँ
जसरी पनि यो ठगकर्म सिकूँ ।३

ठगले मुखले परिपञ्च रची
निमुखा जतिमा पछि पार्छ खसी
जसरी जिबिले सहकारी लुटे
धनले सरकार किनी उछिटे ।४

छ अचेल धनी नभई नहुने
“धनराज” हुँदै “रविराज” हुने
गृहका मतियार हुँदा बनियो
ठग नायक या अगुवा भइयो ।५

हुल एक बनाउनुपर्छ सुरो
यति गर्नसके नहुने अधुरो
गफ गर्नु ठुलो मनभित्र छुने
जनतासँग बोल हुने नहुने ।६

जब हुन्छ चुनाव यहाँ पहिले
नगदी असुली जहिल्यै लिइने
ठगका बलबाट चुनाव जिती
अगुवा गतिलो भरजन्म हुने ।७

०००
खोटाङ