नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

कित्ता समाली जनता बसेका
त्यस्तै छ कित्ता कविले लिएका
आफ्नो छ कित्ता पर हेरिँदैन
छन् टाँसिएका दलभित्र चैन ।

संसार यै भित्र रहेछ मेरो
घेरा बनाएर भएर टेढो
बद्नाम सारा अहिले गराए
जुम्रा र किर्ना जुका बढाए ।

भेडाहरूको हुलमात्र आफ्नो
ब्वाँसाहरूको हुलमात्र आफ्नो
बाँकी बिपक्षी अरूलाई पारी
बन्ने सर्वोच्च अझै अगाडि ।

तानेर खुट्टा जति छन् लडायो
उठ्ने भएमा पनि भाँच्न लायो
सिद्धान्त लाई पहिले जलायो
यो देश बिर्ता जहिल्यै बनायो ।

दोषी अरू हो म सधैँ पवित्र
भन्ने सबैमाझ भरेर चित्र
कस्तो अनौठो अगुवाइ हेर
यो लाजमर्दो तरिका विचित्र ।

हुन्छन् तिनै साँढ बसेर खाने
बन्दा बिपक्षी तर हुन्न खाने
मीठो सबैको तर हुन्छ हेर
इच्छा सबैको तरमात्र खाने ।

भेडो, बिरालो बन या त साँढे
या सिंह या स्याल कि बन्नु भाले
जे जे बने हुन्छ तरै छ खाने
खोजौँ उपाय तर खान जाने ।

०००
खोटाङ