नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

आँखाको भाका न बुझ्छन् पाका न खान्छन् चुरोट
कृषिको कर्म हो मुख्य धर्म गर्दछन् अठोट
पछाडि हट्नु हुँदैन भन्छन् अगाडि सरेर
असारे भाका गाउँछन् पाका खेतमा झरेर।

न भोक तिर्खा न शोक सुर्ता पटुकी कस्तछन्
थालेको काम सुस्ताई पाका न कोही बस्तछन्
कर्तव्य सम्झी हिँड्दछन् पाका जाँगर भरेर
असारे भाका गाउँछन् पाका खेतमा झरेर।

आँधी र हुरी असिना पानी सहेर खट्तछन्
अप्ठ्यारो काम सजिलो ठान्छन् सङ्घर्ष गर्दछन्
सङ्कल्प एक लिएर हिँड भन्दछन् डटेर
असारे भाका गाउँछन् पाका खेतमा झरेर।

हड्डी र छाला चाउरे गाला छ ज्यान अप्ठ्यारो
बिहान काम दिउँसो काम कामै छ पियारो
भविष्यमाथि बन्दछन् प्यासी सिर्जना भरेर
असारे भाका गाउँछन् पाका खेतमा झरेर।

०००
खोटाङ