नेपाली हास्यव्यङ्ग्य अनलाइन पत्रिका

हेम अधिकारी :

हेर्दै झल्झल क्या ! मुहार हँसिलो चम्कन्छ तारासरि
लाली ओठविषे च दाँत लहरी दारिमका हार ती
आँखा गाजलुले र लाल मुखले खुत्रुक्क पा¥यो छली
काली छौ तर प्यारले भनिदिएँ गोरी तिमी सक्कली ।।

कालो केश रहेन खै किन तिमी टाटी र पाङ्ग्री भयौ
मायाले मदहोस पार्न कसरी क्या सान यस्तो ग¥यौ !
हेर्दै आउँछु साँझमा बगरमा पर्खी बसे पातली
काली छौ तर प्यारले भनिदिएँ गोरी तिमी सक्कली ।।

सारी छैन कता गयो किन लुक्यो चोली हरायो कतै ?
साटीछ्यौ फरिया र पेन्ट किन हो थोत्रो भएको उतै
धेरै छैन शरीरमा किन लुगा लाग्यो कि साँच्चै कली ?
काली छौ तर प्यारले भनिदिएँ गोरी तिमी सक्कली ।।

काका, दाइ कि भाइ हौ भन तिमी झुक्याउने हौ कित
फुल्छन् फूलहरू सधैँ झिलिमिली छाड्दै नछाडी रित
जाई, सूर्यमुखी, गुराँस, कुसुमी बेली कि हौ मालती ?
काली छौ तर प्यारले भनिदिएँ गोरी तिमी सक्कली ।।

हेर्दै मुग्ध बनाउने वदन त्यो चिन्नै नसक्ने अनि
हावा पश्चिमको बहेर पुतली हावासँगैकी बनी
डाँफे हौ कि हिमालकी, मुजुर हौ या हौ तिमी गौँथली ?
काली छौ तर प्यारले भनिदिएँ गोरी तिमी सक्कली ।।

०००
दमक, झापा