नेपाली हास्यव्यङ्ग्य अनलाइन पत्रिका

युगल बसेल :

द्वापर युगका कृष्णजीले मुरली बजाए ।
अहिलेका कृष्णजीले हर्न मात्रै दबाए ॥

उ बेलाका कृष्णजीले हरण गर्थे सारी ।
अहिलेका कृष्ण खोस्छन् कस्टमका भारी ॥

जमानाका राधाजीका एउटै थिए प्रेमी ।
अहिलेका राधाजीलाई प्रेमीको के कमी ?॥

नौनी घिउ, दही चोर्थे उनी कृष्ण काले ।
यिनी काले तोरतोराउँदा पोथी चोर्न थाले ॥

सोह्र हजार गोपिनीका जोडा एउटै ग्वाला ।
अहिलेका ग्वालिनी त दसौँ जोडी वाला ॥

त्यस बखतका ग्वालिनीले गोरसपान गर्ने ।
अहिलेका गोपिनीले वाइनले लाद्रो भर्ने ॥

उल्टोपाल्टो जताततै किन होला भाको ?
मेरै नजर दोषी हो कि जुगै दोषी आको ॥

०००
सन्धिखर्क-१, अर्घाखाँची