नेपाली हास्यव्यङ्ग्य अनलाइन पत्रिका

युगल बसेल जीवलाल र गङ्गा बसेलका नाति तथा मुक्तिराम र केतकला बसेलका एकलौटी हकवाला छोराको रूपमा २०२० सालमा तुम्कोट, सन्धिखर्क -१ अर्घाखाँचीमा जन्मिनुभएकाे हाे । हालै सतुङ्गल, चन्द्रागिरी -११ काठमाडौँमा समेत बास बनाएर बसोबास गर्न थालेपछि उहाँको नाक एक्कासि बढेर घिरौँलाजत्रो भएको कुराको गवाही देखिजान्नेहरूले दिने गरेका छन् । स्नातकोत्तर तह पार गरेको कागजको खोस्टो हत्याउनुभएका बसेल कसो कसो गरेर सरकारी पैसाले तरकारी खान पाइने निजामती सेवामा छिर्नुभएकाे थियाे । नेपाल सरकारको उपसचिव पद जिप्ट्याएपछि उमेर हद पार गरेको अभियोगमा टायर्ड नहुँदै २०७८ सालमा रिटायर्ड गराई उहाँलाई जागिरबाट निकाला गरी घोक्रेठ्याक लगाइएको ठिक साँचो हो । युगधारा साप्ताहिकमा २०४५ साल भदौमा आह्वान शीर्षकको कविता छपाएर उहाँले बाङ्मयको क्षेत्रमा पाइला लम्काउनुभएको हो । आफूलाई मृत्युपछि पनि जीवित राख्न सकिन्छ कि भन्ने मृगमरिचिकामा रुमल्लिँदै उहाँले २०७० सालमा हास्यव्यङ्ग्य निबन्ध सङ्ग्रह ´छक्का` छपाउनुभएकाे छ । पुरस्कार भने पाठकको मायाको रूपमा हसुरेको मात्राको लेखाजोखा गर्न बाँकी नै रहेको गोप्य कुरा उहाँ सुटुक्क बताउनुहुन्छ ।