नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

चहारे सबै ठाउँ राम्रा नराम्रा
नियालेर हेरेँ पुरानो र हाम्रा
सबै शून्य संसार देखी हराएँ
यिनै शब्द लेखेर आनन्द पाएँ ।१

तपाईं मपाइँ मलाई बनाएँ
घमण्डी सबैका म भित्रै जमाएँ
सबै दुष्टलाई त आफ्नो बनाएँ
यिनै शब्द लेखेर आनन्द पाएँ ।२

रवाफी कबाफी सराफी बनाएँ
महीमत्त आफैँ सधैँको बनाएँ
गफाडी अनाडी यही हो चिनाएँ
यिनै शब्द लेखेर आनन्द पाएँ ।३

यता शब्द राखेँ उता थाप्न च्याँखे
छ झर्को कसैमा कसैको म आँखे
लिएँ सापटी शब्द लेखी मिलाएँ
यिनै शब्द बङ्याउँदैमा रमाएँ ।४

सिलाएर राखेँ मिलाएर राखेँ
टुटेका फुटेका समालेर राखेँ
नफुट्ने नटुट्ने नभन्दै मिलाएँ
यिनै शब्द बङ्याउँदैमा रमाएँ ।५

०००
खोटाङ