नेपाली हास्यव्यङ्ग्य अनलाइन पत्रिका

लक्ष्मी माली :

यसपालिको तिहारमा
कजिनी दङ्ग पर्दै भन्न थालिन् ‘रातै राम्रो’
गोमा बज्यै छक्क पर्दै भन्न थालिन्
‘रातो भनेको त सौभाग्य हो !’
किन कि
बारीको सयपत्री फूल रातो रङ्गमा फुलेछ
काजीसाबले त सेतो गोदावरी
सार्नुभा’को थियो ।
पण्डितले पनि पहोलो सयपत्री
लगाउनुभा’को थियो
रातो भएर कसरी फुलेछ ?
माटोको धर्म
कजिनीलाई थाहा छैन क्यारे
गोमा बज्यैलाई पनि थाहा भएन क्यारे
गएको साउनमा
लेकबाट बगेको पानी रातै थियो
मल भएर पानीसँगै बगेको
पत्कर पनि रातै थियो
रातो मलजल खाएको माटोले
सेतो र पहेँलो फूल
कसरी फुलाउन सक्ला ?

०००
काठमाडाैं
फित्काैली अङ्क ३, (२०६२)