नेपाली हास्यव्यङ्ग्य अनलाइन पत्रिका

बिन्दु दाहाल मुकदर्शक :

सधैँ भोलि भन्दै झुलाए मलाई
यसो गर्न थाल्दा नहोला भलाइ
कयौँ पल्ट धाएँ भने भोलि भोलि
पिलाएर पीडा बसे झन् नबोली ।

उता जा यता आ इसारा छ खालि
प्रतीक्षा गरेँ व्यर्थ बोली छ जाली
सबै काम सुस्ती गरी ढुक्क बस्छ्न्
मुखालेहरूले सधैँ तेल घस्छ्न् ।

कतै छैन चाँडो धिमा देख्छु काम
सबै भ्रष्टकै देशमा उच्च नाम
उपेक्षा भयो आज स्रष्टाहरूको
छ सम्मान चम्चे बुख्याचा अरूको ।

बटार्छन् कुरा टार्दछन् काम हाम्रो
हरामीहरूको छ बानी नराम्रो
खुदै कर्मचारी भए जाल गर्ने
जताबाट आफ्नै सधैँ पेट भर्ने ।

पुरानै छ चाला तिनै देख्छु जोगी
अझै खन्चुवा छन् सबै द्रव्यभोगी
नयाँ तन्त्रमा झन् बढे लामखुट्टे
वृथा दु:ख दिन्छन् झुटा माखिबुट्टे ।

०००
दमक, झापा