नेपाली हास्यव्यङ्ग्य अनलाइन पत्रिका

रामशरण न्याैपाने :

व्यवसाय राम्रो भेटेँ विना लगानीको
पार्टीभित्र पसेँ हजुर लगाएर टीको।
आफू नेता बन्नुपर्छ श्रीमती ऊ नेती
गौचरमा गर्नुपर्छ सुवर्णको खेती॥१

आफू चाहिँ बस्नुपर्छ बाँधी इन्द्रासन
आफ्नालाई बाँड्नुपर्छ स्रोत र साधन।
भए हुन्छ जनता र देशलाई क्षति
गौचरमा गर्नुपर्छ सुवर्णको खेती॥२

ईश्वरले रचेको यो स्वर्गजस्तो पाटो
जताबाट आए पनि एउटै हुन्छ बाटो
आफ्नै मान्छे जाँचकी र सुरक्षा सेटी
गौचरमा गर्नुपर्छ सुवर्णको खेती॥३

नेपालमा छैन कोही भुँडी नभएको
को छ ठुलो नेता यहाँ जेल नगएको?
भोलि जे जे हुन्छ सँगै बसौँला है चेती
गौचरमा गर्नुपर्छ सुवर्णको खेती॥४

कालेकाले मिली सधैँ खाएकै हो भाले
गाईजात्रा मनाउँदै नाचौँ गोरे काले
झुपडीका मान्छे धेरै दर्बार पसे ती
गौचरमा गर्नुपर्छ सुवर्णको खेती॥५

०००
भक्तपुर