नेपाली हास्यव्यङ्ग्य अनलाइन पत्रिका

उत्तम विचार भेटुवाल :

कसले भन्छ विकास छैन निकाश छैन कसले
बाटो छेकी समृद्धिको बिरोध गर्छ जसले ।।

तुइनको बिस्थापन गरिसक्यो पुलले
लामखुट्टे भगाएझैँ नहालेको झुलले ।।

जनताका दु:ख हेर्न टावर ठडिँदै छन्
भेकाएका पेटसँगै आँखा गढिँदै छन् ।।

गर्नुसम्म त्याग मैले गरेकै हो हेर
कुर्सीलाई प्रदक्षिणा दिनरातै गरेर ।।

सडक देखि सदनमा शान्ति छाएको छ
त्यसैले यो मुहारमा कान्ति छाएको छ ।।

जनताले खाएपछि खाने हैन मैले
भोकाएका छन् कि कोही सोधिएन कैले ।।

युवाहरू खाडी पस्ने बढेकै छ गति
विप्रेषण भित्र्याउनु हो हाम्रो सम्पत्ति ।।

भ्रस्टाचार गर्दिनँ म गर्न दिने छैन
लुकीचोरी खाए भने देखिने त्यो हैन ।।

रेलगाडी चलिसक्यो रक्सौल जनकपुर
ढ्यापढ्याप गर्दै सहचालक भन्छन् जाऊँ हजुर ।।

बयासीमा छँदै खेरी चौरासीको रनको
हजुरका सामु पोखेँ पीडा भित्री मनको ।।

०००
काठमाडाैं ।