नेपाली हास्यव्यङ्ग्य अनलाइन पत्रिका

‍रामशरण न्यौपाने :

मान्छेबाट छुटेर टाढिन गयो हाँसो खुसीको पल
हाम्रो राष्ट्र विकासबाट छलियो साह्रै भयो दुर्बल
जागी सुन्दर चेतना सकलमा रोपौँ जगाऔँ अब
भ्रष्टाचार ‍दबेर भित्र अडिने काटौँ जरो नै सब॥१

अत्याचार हुँदैन लुक्नु सबले खोली उदाङ्गो गरौँ
निन्दाले सब भ्रष्टका उपरमा कालो सबैले धरौँ
जस्ले लौन गिराउँदैछ जगमा नेपालको गौरव
भ्रष्टाचार ‍दबेर भित्र अडिने काटौँ जरो नै सब॥२

भेटौं कर्तुत त्यो बिनेर सबको सन्तोष होला तब
खोजौँ स्रोत कामाइको र धनको जोखौँ सबै वैभव
सारा भ्रष्ट समातिए र थुनिए सन्तोष होला तब
भ्रष्टाचार ‍दबेर भित्र अडिने काटौँ जरो नै सब॥३

नाङ्गेझार गरेर राख तिनको खैचेर सारा बल
मान्छे भ्रष्ट समाजको र जनको हो धुन्धुकारी खल
वर्षौंसम्म सह्यौँ सहिन्न सहजै यो धृष्टता लौ अब
भ्रष्टाचार ‍दबेर भित्र अडिने काटौँ जरो नै सब॥४

पैसामा जुन बिक्छ लाज घिनले छोडेर सारा दिन
निन्दा गर्न भुलेर भ्रष्ट जनको सम्मान गर्छौ किन?
फेर्नै पर्छ यहाँ समाज वीरले छर्दै नयाँ सौरभ
भ्रष्टाचार ‍दबेर भित्र अडिने काटौँ जरो नै सब॥५

०००
भक्तपुर