नेपाली हास्यव्यङ्ग्य अनलाइन पत्रिका

कलानिधि दाहाल :

पाइतालामुनि
छ माटो
शिरमाथि
छ आकाश भनेर
हामी
कहिले
ताराहरू हेर्छौ
कहिले
जून हेर्छौँ
कहिले
आकाशबादलको
लुकामारी खोजिरहेका हुन्छौँ
जमिन छ भनेर
पाइतालामुनि
माटो टेकेको बहाना
विश्वास बनेर उभिन्छ
यसर्थ म
देशको हिसाब गर्छु
विधिविधानको रमाइलो
गफ ओठहरू कुर्लिन्छु
चुनाव नाटकको
जालीदार रङ्गमञ्च छँदै छ
म पक्ष उभिन्छु
विपक्ष ओच्याउँछु
नारा उचाल्छु
-लाल सलामका
-जय नेपालका
-अभिवादनका
-देश बचाऊका
-धर्मरक्षाका
-संस्कारसंस्कृतिका
मिथ्याका धमिला
भेल पौडेर
भ्रमका सिरकले
सर्लक्क शिर छोपेर
दिग्भ्रमित यात्राका
असङ्ख्य गौँडा ठोक्किदै
हामी
बारुदका ओच्छ्यान जलिरहेछौँ
सुपरसोनिकका
बाक्ला
असाध्य ताता सिरक
जलिरहेछौँ एकटुक्रो सास
एक पित्को शरीर
र नारा उचालिरहेछौँ
-जय नेपालका
-लालसलामका
-घृणाको पहाड राजा आऊका
-नेता ल्याऊका
सडकमा नारा ओच्छ्याएर
ताता बारुद बलिरहेछौँ
राडार निशानका
शिरमा आकाश
जलिरहेछौँ सुपरसोनिकका
ताता हर्हराउँदा मुस्लाहरू
कति भ्रम बाँचेका छौँ
पाइतालामुनि
माटोको देश
र शिरमाथि
-सूर्यचन्द्र
-तारा
-घामपानी
-बादल
र शीतको सप्को
छाती छोपेका छौँ भनेर !!

०००
कलेकुटी, काठमाडाैं