नेपाली हास्यव्यङ्ग्य अनलाइन पत्रिका

कुसुम ज्ञवाली :

बोकेर रुमानी सम्राट सपना
छिचोल्दै दुःखका उकालीहरू
दौडिदै दौडिदै आएका छन्
काला वा गहुँगोरा लिगलिगहरूबाट
नयाँ घलेहरू उत्तर-अमेरिका

चमेनागृहको जुठेल्नोमा
वा तन्दुरको तातो भट्टीमा
फलामे गाडामा तान्दै
परिबन्द बाध्यताको भारी
खोजि रहेका छन्
एउटा चेपेको किनार
जहाँबाट सुरुसम्म गर्न सकियोस्
एउटा लम्बे ऐतिहासिक दौड

हराएको पहिचान माग्दै
खुट्टा बजार्न सडक छैन
छिमेकीको उक्साहटमा
लज्जास्पद माग बोकेर
धम्क्याउन कुनै राज्य छैन ।

०००