नेपाली हास्यव्यङ्ग्य अनलाइन पत्रिका

तेजप्रकाश श्रेष्ठ :

बलेको बत्ती हेर यहाँ
जलन रातो छ
मुटुको ढुकढुकी नियाली हेर
रगत रातो छ ।

करोडौँ पुँजीपति पनि
सर्वहाराको ढोङ रच्छन्
दसौँ महलका मालिकहरू
पूर्वाभासका हकदार बन्छन्
यो समाज यस्तै उल्टो छ
युगौँदेखिको उल्टो सुल्टनुपर्छ ।

देशको पाखा पाखा हेर
गुराँस रातो छ
मेरो र तिम्रो हृदय हेर
रगत रातो छ ।

शोषणको अन्त गर्न
शोषकहरू स्वाङ रच्छन्
सुन्दर आवरणभित्र
कालो राक्षस लुकेको हुन्छ,
यो समाज यस्तै विसङ्गत छ
यहाँ क्रान्तिको बिगुल बज्नुपर्छ ।

निधारको टीको हेर
सङ्घर्षको सिम्रिक रातो छ
राष्ट्रियतालाई गमेर हेर
रगत रातो छ ।

२०२९ साउन १५

०००
जाँगरकाे कल्पवृक्ष (२०८३)