नेपाली हास्यव्यङ्ग्य अनलाइन पत्रिका

भालेहरू बाँझो खेतमा रातो सिउर दाउन थाले
झिँगाहरू डल्लामाथि बसी गीत गाउन थाले
कमिलाले बाउसे गरी जताततै मल फाले
मुसाहरू लजाउँदै चारो फाल्ने ढल हाले ।

बिउ रोपे बाख्राहरूले बाँदरले खने आली
सुगा खेतमै बस्यो अनसन बजाउँदै ताली
धमिराले चपाएरै लडाइदिए फूलको डाली
सहमति भो मच्छरलाई बनाउने माली ।

जुकाहरू पानीमाथि हेलिकप्टर चलाउँथे
फटेङ्ग्राले झुक्याएर गोलीगट्ठा ढलाउँथे
बाली बढ्न थालेपछि गुलेलीले लडाउँथे
भोका बाघ खेतमा आउँदा रेडलेबल चडाउँथे ।

मौरीहरूले तोरी छरे गौंथलीले डोको भरे
चिल उडे आकासमा भुइँमा चल्ला मरे
मलामीको ताँती लाग्यो आकासको कालो बादल
कामको मेसो पाउन छोडी मान्छे भयो पागल !

झापा, हाल : काठमाडौं