नेपाली हास्यव्यङ्ग्य अनलाइन पत्रिका

किन हाम्रो कुण्डलीमा राहू मात्र हुन्छ ?
आफ्नै चल्ला नास्ता गर्ने माउ मात्र हुन्छ

एकचोटी छामिहेर हरेक मान्छेलाई
हृदयमा असीमित घाउ मात्र हुन्छ

कसलाई तिमी सज्जन भन्छौ अनि आफ्नू मान्छे ?
हरेक दुष्ट शकुनीको बाउ मात्र हुन्छ

भस्मासुर धुन्धुकारी पुगे शीर्षतिर
जो पुगे नि मुलुकलाई साहु मात्र हुन्छ

छैनन् यहाँ बोटेहरु तरिन्न यो भेल
हाम्रो लागि जैले पनि नाउ मात्र हुन्छ

पसिहेरौं हृदयमा हरेक मनीषिको
फगत् आफ्नै भूँडी भर्ने दाउ मात्र हुन्छ

पुगेहुन्थ्यो शिखरमा इमान र धर्म
नाम्चेबाट उँभो लाग्ने भाउ मात्र हुन्छ ।

चितवन