नेपाली हास्यव्यङ्ग्य अनलाइन पत्रिका

देशमा सरकार परिवर्तन भएर नयाँ मन्त्रिपरिषद् बन्यो कि मेरा आँखा, कान र सम्पूर्ण ध्यान पत्रपत्रिका, रेडियो र टेलिभिजनतिर एकोहोरिन थालिहाल्छन् । नयाँ मन्त्रीहरूका नयाँ नयाँ विचार र अभिव्यक्तिहरू सुन्न र पढ्न म लालायित हुन्छु । नयाँ प्रधानमन्त्री–मन्त्रीहरूले यति धेरै ज्ञानवर्धक र उपयोगी विचारहरू प्रस्तुत गर्छन्, सुनेर स्वर्गीय आनन्द प्राप्त हुन्छ । उनीहरूका भाषण सुन्न थालेपछि ठूल्ठूला सन्त, महात्मा, दार्शनिक, विश्वविख्यात राजनेताहरू वा साहित्यकारहरूका संसारलाई तरङ्गित पार्ने विचार र महान् वाणीहरू पनि खल्ला लाग्छन् । हाम्रा महापण्डित मन्त्रीहरूका महान् अभिव्यक्तिहरू सुनेर हामी स्तब्ध हुन्छौँ । यस्ता महान् विचार र ज्ञानहरू उनीहरूले कसरी कहाँबाट प्राप्त गरे होलान् ? त्यसका लागि कति गहिरो अध्ययन गरे होलान् ? कुन ओडारमा बसेर कति वर्ष तपस्या गरे होलान् ? आश्चर्य लाग्छ ।

भर्खरै हाम्रा प्रधानमन्त्री सुशील कोइरालाले उता बर्दिया, नेपालगन्जतिरको भ्रमणमा त्यस्तै दिव्य विचारहरू प्रस्तुत गरेको सुनियो । ‘सबै दलबीच सबै कुरामा सहमति भयो भने संविधान एक वर्षमै बन्छ ।’ लौ हेर्नूस्, कस्तो अद्वितीय अभिव्यक्ति ! यस्तो कुरा तपाईं–हामीलाई थाहा थियो त ? ‘देशलाई शान्ति चाहिएको छ । शान्ति नभई स्थायित्व हुँदैन । स्थायित्व नभई विकास हुँदैन ।’ यस्ता नयाँ नयाँ र अपूर्व विचारहरू उनले व्यक्त गरेका छन् ।

‘विकासको मेरुदण्ड यातायात हो, त्यसैले ठाउँठाउँमा सडक बनाउनुपर्छ’, यातायातमन्त्री विद्वता प्रकट गर्छन् । ‘खडेरी पर्यो भने कृषि उत्पादन घट्छ’ कृषिमन्त्री ठोकुवा गर्छन् । ‘भात खायो भने अघाइन्छ, नत्र भोकै परिन्छ’ बिनाविभागीय मन्त्री पनि कम विद्वान् देखिँदैनन् ! ‘सरकारी र निजी विद्यालयको शिक्षामा ठूलो खाडल छ, त्यो खाडल पुर्नुपर्छ’ शिक्षामन्त्री त यसै पनि विद्वान् हुने नै भए ।

‘सुत्यो भने शरीरलाई आराम हुन्छ । बिरामी भइयो भने तुरुन्त अस्पताल जानुपर्छ’ भनेर स्वास्थ्यमन्त्री वक्तव्य जारी गर्छन् । ऊर्जामन्त्रीको ऊर्जा धपकधपक बल्छ । भन्छन् ‘नेपालमा जलस्रोतको अपार भण्डार छ । त्यसको उपयोग गरेर हामीले अथाह उपलब्धि हासिल गर्न सक्छौँ । बिजुली निकालेर लोडसेडिङ समाप्त गर्ने मात्र होइन, बिजुली बेचेर देशलाई धनी बनाउन सक्छौँ ।’ ल हेर्नूस्, कस्तो नौलो विचारको आविष्कार !

गृहमन्त्रीको ज्ञान अझ बलवान् । उनी गुन्डा, चोर, डाँका, पाकेटमार र हत्यारालाई समातेर थुन्नुपर्छ भनेर प्रहरी अधिकारीहरूलाई सिकाउँछन् । यस्ता अति ज्ञानी, विद्वान्, दूरदर्शी विचारबाट ओतप्रोत प्रधानमन्त्री तथा मन्त्रीज्यूहरूको विद्वताबाट यो देशले तुरुन्त लाभ लिइहाल्नुपर्छ, मेरो सुझाव छ । त्यसको सुरुआत तल्लो तहबाट गर्नुपर्छ । ती विद्वान् महोदयहरूले व्यक्त गरेका विचारहरूमा आधारित रहेर तुरुन्तै विद्यार्थीहरूमाझ ‘खायो भने अघाइन्छ’, ‘सुत्यो भने निदाइन्छ’ अथवा ‘पानीबाट बिजुली निस्कन्छ’ आदि शीर्षकमा निबन्ध प्रतियोगिता गराउनुपर्छ ।

‘नेपाल’ अङ्क ५९०, चैत २०७०