नेपाली हास्यव्यङ्ग्य अनलाइन पत्रिका

१.
रित्ता डाला डोकाहरू छन्
समस्याका पोकाहरू छन्
अपच डकार्छन् महलभित्र
तर झोपडीमा भोकाहरू छन् ।

२.
मलाई बेकार अलमलमा फसाउन नखोज
निष्कर्षहीन छलफलमा फसाउन नखोज
प्रसन्न यसै छु पसिनाको कमाइले म
भ्रष्टाचारको दलदलमा फसाउन नखोज ।

३.
कतै भ्रष्ट आचरणका कुरा चलेका छन्
कतै शुद्धीकरणका कुरा चलेका छन्
रहस्य अनुद्घाटित यस परिवेशमा
कतै केवल बाहिरी आवरणका कुरा चलेका छन् ।

४.
वस्तीहरूमा कतै उल्लासको नाचगान छ
कतै शोक छ, सन्त्रास छ, कतै सुनसान छ
फैलिरहेछन् आज पनि विषमताका लहराहरू
कसैलाई सम्मान छ, कसैलाई अपमान छ ।

५.
गर्भमा सम्पत्तिको खानी छ हामीसँग
खोजी नगर्ने बानी छ हामीसँग
बस्ती अँध्यारै छन्, खेत बाँझा छन्
उपयोगै नभएको पानी छ हामीसँग ।

६.
अँध्यारोलाई अँध्यारोले हटाउन खोज्छौं हामी
उज्यालोलाई उज्यालोले दबाउन खोज्छौं हामी
लाग्छ यस्तो सिद्धान्तको अनुसरण गर्दै छौँ कि
सुतेकालाई सुताएरै उठाउन खोज्छौँ हामी ।