नेपाली हास्यव्यङ्ग्य अनलाइन पत्रिका

पोखरा– सात वर्षको अन्तरालमा मह (मदनकृष्ण श्रेष्ठ र हरिवंश आचार्य) जोडीले फेरि पोखरालाई हँसाएका छन् । टुबोर्ग महजात्रा हास्य महोत्सव लिएर पोखरा पुगेका उनीहरूले गत साउनको तेस्रो हप्तादेखि हँसाउन थालेका हुन् । महको महोत्सव सोमबारसम्म चलेको थियो ।

पोखरा सभागृहमा हरेक दिन मह सहितका कलाकारले अढाई घन्टासम्म दर्शकलाई पेट मिचीमिची हाँस्न बाध्य पारेका थिए । कहिले राजनीति त कहिले सामाजिक, कहिले जातीय त कहिले लंैगिक विषयमा उनीहरूले घोचपेच गरे । गोर्खा ब्रुअरीको टुबोर्ग बियरको सहकार्यमा मह टोली पोखरामा पुगेका हो । उनीहरूले यसअघि राजधानीमा २७ दिनसम्म यही प्रस्तुति प्रस्तुत गरे थिए ।

टोलीमा नरेन्द्रर कंसाकर, वसुन्धरा भुसाल, राजाराम पौडेल, किरण केसी, शिवहरि पौडेल, दिलीप रायमाझी, मोहितबंश आचार्य, यमन श्रेष्ठ लगायतका कलाकार पनि छन् । किरण केसी, शिवहरि पौडेल र राजाराम पौडेलको ‘बोर्डर चेकपोस्ट’ महजोडीको शब्दान्ताक्षरी र दिलीप रायमाझीको नाचले सभागृह पुगेका दर्शकले पूरै समय कलाकारलाई साथ दिएका थिए । नेपालका राजनीतिक नेताहरूलाई भारत र चीनले कसरी आफ्नो पोल्टामा राखेको छ भन्ने बारेमा गरिएको व्यङ्ग्यमा सबैभन्दा बढी तालीको गडगडाहट सुनिन्थ्यो । त्यसबाहेक सामाजिक र लैंगिक व्यङ्ग्यले पेट मिच्न बाध्य पारिएको थियो ।

कार्यक्रम हेर्न पुगेका दर्शकले टिकट किनेको रकम खेर नगएको प्रतिक्रिया दिए । ‘मैले यी कलाकारको प्रस्तुति पहिला पनि हेरेको थिएँ । अहिले पनि निकै रमाइलो लाग्यो ।’ परिवारैसित आएका लेकसाइडका भरतराज पराजुलीले भने, ‘हँसाउने कलाकार भएकाले होला, अनुहार देखे पनि हाँसो लाग्ने रहेछ । यो उमेरसम्म पनि धेरै कुरामा अपडेट भएर हँसाउन सक्ने क्षमता उहाँहरूमा छ ।’ सात वर्षपछि हास्यव्यंग्य कार्यक्रम लिएर पोखरा आउन पाएकामा खुसी लागेको कलाकारको भनाइ छ । ‘फिल्म खेल्न बीचमा पोखरा आएका थियौं । तर रंगमञ्चमा सात वर्षपछि झुल्किदैछौँ’ हरिवंश आचार्यले भने । ‘मेरो र हरिवंशको ३४ वर्षको सहयात्राको उपलब्धि नै यही हो । सहयात्राको नतिजाको रुपमा हामीले यहाँ प्रस्तुति गर्दैछौं’ अर्का कलाकार मदनकृष्ण श्रेष्ठले भने ।