नेपाली हास्यव्यङ्ग्य अनलाइन पत्रिका

यस्तै हो जिन्दगी
सिसिफसको कथाजस्तै
अलिकति बनायो
फेरि खसिदिन्छ कृष्णभीर
एक सर्को पुछेर आँसु
संगालेर आँखाभरि सपना
अलिकति यताबाट
उताबाट अलिकति
तुन्यो अनि बुन्यो
जिन्दगीका सुन्दर–सुन्दर सपनाहरु
तर खसिदिन्छ फेरि कृष्णभीर
अघि हेर्यो–
गन्तव्यतिरको दिशा ताक्दै
रोकिएका यात्रुहरुको लस्कर
पछि हेर्यो–
गन्तव्यका लागि हतारिएका
मानिसहरुको लस्कर
अथवा भनौं
सपनाहरुको लस्कर
अथवा भनौं
जपनाहरुको लस्कर
तर, यस्तै हो साथी ‘वर्षात्’मा
फेरि खसिदिन्छ कृष्णभीर ।
योजनाहरु सपनाजस्तै
सपनाहरु योजनाजस्तै
तुने पनि भत्किन्छन्
भत्किन्छन् बुने पनि
उने पनि फुकिन्छन्
यस्तै हो साथी ‘वर्षात्’मा
जिन्दगीको कृष्णभीर ।

२०५९ माघ २९