प्रेम ओली ढकलपुरेबिचरा महादेव
घर बाहिर
महादेवलाई देखेपछि
कति हुरुक्क हुन्छन्
कति फुरुक्क हुन्छन्
तर घरभित्र
श्रीमतीहरू बुरुक्क हुन्छन्
के शक्ति रहेछ पार्वतीमा
बिचरा महादेव थुरुक्क हुन्छन् ।
घर बाहिर
महादेव भनेपछि
कति खुरुक्क सुन्छन्
कति तुरुक्क रुन्छन्
तर घरभित्र
श्रीमतीहरू जुरुक्क हुन्छन्
के भक्ति रहेछ पार्वतीमा
बिचरा महादेव लुरुक्क हुन्छन् ।
घर बाहिर
महादेव भनेपछि
कति डरले पुलुक्क हेर्छन्
कति नबोली सुलुक्क टेर्छन्
तर घरभित्र
श्रीमतीहरू भुलुक्क हुन्छन्
के जुक्ति रहेछ पार्वतीमा
बिचरा महादेव छुलुक्क हुन्छन् ।
घर बाहिर
महादेवलाई भेटेपछि
कति मोहित हुन्छन्
कति सम्मोहित हुन्छन्
कति घायल हुन्छन्
तर घरभित्र
श्रीमतीहरू तातो टायल हुन्छन्
के युक्ति रहेछ पार्वतीमा
बिचरा महादेव हायल कायल हुन्छन् ।
घर बाहिर
महादेवलाई देखेपछि
कति मुसुक्क हाँस्छन्
कतिले खुसुक्क डाक्छन्
तर घरभित्र
श्रीमतीहरू ठुसुक्क हुन्छन्
के ओखती रहेछ पार्वतीमा
बिचरा महादेव लुसुक्क हुन्छन् ।
दाङ, हाल– काठमाडौं
Subscribe
Login
0 Comments
Oldest
