नेपाली हास्यव्यङ्ग्य अनलाइन पत्रिका

आज अड्डाको काम पैसा भो
तलब त कर्मचारीको खाजा भो ।
जनताको काम भन्दा
टेबलमुनिको नगद प्रिय भो ।
नियम कागजमा सीमित
बोल्ने उल्टै बदनाम भो ।
कसले सुन्ने पुकार
निरीह जनता ट्वाल्ल भो ।
निवेदन गर्ने कसलाई
सुन्ने अन्धो बहिरो भो ।
अख्तियार पनि यहाँ
सानाका लागि काल भो ।
खुलेआम हेर्नुहोस् त
नापी माल नोट भो ।
सोझो गाउँले गरोस् के
सानो काम पहाड भो ।
कहीँ नोट कहीँ चोट
जनता मात्र घायल भो ।
के हाकिम के कर्मचारी
कार्यालय त ससुराली भो ।
सोझासाझा जनताका लागि
आज अड्डा तारीख भो ।
भन्सार टक्सार यहाँ
सबको पहिलो तारो भो ।
एउटै डिग्री भए पनि
कसैलाई किन बाँच्न गाह्रो भो ?

विराटनगर