नेपाली हास्यव्यङ्ग्य अनलाइन पत्रिका

टोक्ने हिम्मत छैन कुक्कुर भने, बेकार हो भुक्नु ता
जुध्ने हिम्मत छैन डुग्रनु यहाँ, बेकार साँढे गधा ।
ढल्केकी वय अङ्गना जतिसुकै, शृङ्गारमा चम्किँदा
प्रेमीका मन कल्पिदैन कहिल्यै, वैली सकेका हुँदा ।।१।।

भो–भो गर्जन छोड, बन्धु अब ता, खोक्रो भयौ बादल
वर्षा गर्न सकेन कानुन नयाँ, छोक्रा भए है दल ।
मात्रै क्रान्ति पिलाउने मन गरी, दौडी नहिंड्नु अब
खुट्टी देखिसक्यौँ नखोक अगुवा, हेर्छौं तमासा सब ।।२।।

रोल्पा, दाङ, महोत्तरी जति थरी, जिल्ला र ठाउँ घुम
नारा प्यून तयार छैन जनता, गम्भीरताले बुझ ।
जस्मा दर्शन मूल्य त्याग नरही, ब्यापार नीति बढ्यो
सामन्ती मदमत्त भो मनभरि, सिद्धान्त पूरै सड्यो ।।३।।

त्यस्ता दुष्ट लघार्छ, शिष्ट जनता, जिल्ला नजाऊ अब
कोही मर्न तयार छैन जनता, नेता चिन्यौँ जब्बर ।
जस्तै भाषण भेल ली पुग तिमी, मेची महाकालीमा
श्रद्धाभक्ति चढाउँदैन जनता, भद्दा महाजालीमा ।।४।।

धादिङ