नेपाली हास्यव्यङ्ग्य अनलाइन पत्रिका

पुरुष भन्नेबित्तिकै पौरखी प्राणी हुन् भन्ने पक्का हुन्छ । सृष्टिकै सुरुदेखि महिलाले पुरुषदेवकै रूपमा खुरुखुरु पूजा गरे । सर्वोत्कृष्ट र परोपकारीका रूपमा पुरुषदेवले ख्याति कमाए । पावरफुल भएरै जन्मसिद्ध मुलुकको मालिक बने, नियमकानुन बनाए आफ्नै हितमा । पुरुषदेवले बनाएका कानुनका कुरामा कसैले कन्सिरी तताएनन् । आफैँमा अति पवित्र । कहिल्यै वरपर सर्नु नपर्ने । शुद्ध हुन सुनपानी छर्नु नपर्ने । चारजात छत्तीस वर्णमा मात्र हैन, आठजात अठासी वर्णमै उपल्लो दर्जाका हर्ताकर्ता पुरुषदेव नै हुन् ।

यस्ता सर्वगुण सम्पन्न पुरुषदेवको सर्वत्र एकछत्र रजगज चल्याछ । यसरी चल्नुमा पुरुषदेवको चानचुने चलाखीचाहिँ छैन । ब्रह्माबुढादेखि वैरागी चेलासम्म, चटकेको खेलादेखि लफुङ्गाको फेलासम्म सुकर्मको सुनाम साँट्ने उनै पुरुषदेव । त्यसैले धर्मशास्त्रदेखि चलचित्रका पात्रमा समेत पुरुषकै मात्र पौरख देखिन्छ ।

परापूर्व कालदेखि नै हाम्रो परम्परा र रीतिथितिको स्थिति निकै राम्रो छ । धर्मको नाममा कर्म गर्ने धर्मकर्मीको कमी छैन । बाढी र पहिरोले गाउँघर पूरै बगाए पनि बमबम भोले भन्दै पहँेला वस्त्र धारण गरी बडो कष्टका साथ बोलबमको लर्को लागेकै छ । आखिर इहलोकमा गाँसबासको सत्यानास भए पनि परलोकमा परमानन्द दिने उनै दयावान् देवमहादेव हुन् । “अगिको दुःख पछिको सुख” राम्रो भनेझैँ सज्जन धर्मात्माले पछिकै बाटो साँच्या छन् । आतेसमा हारगुहार गर्न जाँदा पनि हरेस नखाने आदेश उनै भगवान्ले दिन्छन् । भगवान्कै भरोसामा संसार चलेपछि भगवतीको गति गिर्दो छ । त्यत्रा औधी तेत्तीसकोटी देवतामा, देवी त दुईचारवटी न हुन् । अल्पमतको जमाना उहिल्यै गयो । पावरलेस देवीको चाकडी गर्नुभन्दा, पावरफुल देवता पुरुषदेवको चाकडी गर्नु बेस हुन्छ ।

त्यसैले होला विद्याकी देवी सरस्वतीको स्तुतिमा पनि कमी आएको । उनको अब्बल दर्जाको दज्र्यानी सटिफिकेट डाक बडाबडमा घरघरमै हुन्डामुन्डा लिलाम हुँदै छ । दिनरात सकी नसकी पढेर सरस्वतीको भक्ति ग¥यो, शक्तिशाली सटिफिकेट अर्कै अनाडीले उछिट्याउँछ । अर्की उस्तै छिन् धनकी देवी लक्ष्मी । अनेक जुक्ति बुद्धि जुराएर दुईचारसय जोहो ग¥यो, सुटुक्क एउटा सुरबिर अँध्यारामा आउँछ । पिँडालुका डाँक्लाको बन्दुक बनाएर कन्चटमा तेस्र्याउँछ । अनि जिली न गाँठी पारेर सर्वस्व जिम्ट्याउँछ । पुलिसकहाँ पोल पु¥यायो, पोल पुगेकै पर्सिपल्ट सखारै पुलिस टुप्लुक्क आइपुग्छ । उल्टै आफैँलाई हप्कीदप्की पार्दै सोधखोज गर्छ । बयानको बेलीबिस्तार लिन्छ । अन्तमा बयान नमिलेको बहाना गर्दै ऊ बाटो लाग्छ । बिचरी लक्ष्मीको खै के लाग्छ ?

पूजाआजा बर्ततीर्थ वास्तवमै पुरुषदेवकै गर्नुपर्छ । बोलबम भन्दै लागेको लर्को टुिङ्गन नपाउँदै, हरितालिका तीजको व्रत आउँछ । पानी पिउँदा स्वामीदेवको रगत हुने खतरनाक व्रत पनि उनै पुरुषदेव महादेवको हो । कात्तिकको कठ्याङ्ग्रिने जाडोमा बिहानै नुहाएर पानी चढाउने व्रत पनि उनै पुरुषदेव विष्णुदेवको हो र पूजाचाहिँ उनै देवाधिदेव पुरुषदेव महादेवको ग¥यो ।

अति नै हुँदा पनि पुरुषदेव शक्तिशाली र सहनशील हुनाले सहेको छ । नत्र निक्कै कठिन हुन्थ्यो होला । जाडो मौसममा महिलाले दिएको अँजुलीका अँजुली चिसो पानी पिउँदा देवाधिदेव पुरुषदेवको पेट नै ढाडिएर । तर जोसुकैले जेसुकै जतिसुकै दिए पनि नाइँनास्ती नगरी लिइरहने र माग्ने, जोसुकैले जेसुकै जतिसुकै मागे पनि दिइरहने पुरुषदेव नै हुन् । यस्ता पुरुषदेवका पाउ पर्न र पूजा गर्न प्रत्येक दिन नचुकौँ । यसमै हामी सम्पूर्ण प्राणीजगत्को कल्याण छ ।

हाल, काठमाडौँ