नेपाली हास्यव्यङ्ग्य अनलाइन पत्रिका

समाचारमा मैले सुनेँ, “फलाना नेताले बिचार व्यक्त गर्नु भयो”
समाचार वाचकले सरासर अत्याचार गर्नुभयो
बिचार शब्दलाई नेतासँग जोडेर,
बिचार शब्दमाथि कत्रो व्यभिचार गर्नु भयो !

सगरमाथाको टुप्पोमा डढेलो लाग्नु र–
नेताबाट बिचार व्यक्त हुनु उस्तै उस्तै हो,
तैपनि समाचार वाचकले समाचारमा भन्नुभयो
“नेताले बिचार व्यक्त गर्नु भयो” !

बिचारमा कम्तिमा चार बि हुनुपर्छ–
विवेक, विध्या, बिउ र बिन्ति ।
यी चारवटै शब्द बिख हुन्छन् नेताका निम्ति ।
चार बि मा चारवटै बि थिए छन त नेताका भनाइमा–
बिगो, बिघ्न, बिल्लीबाठ, र बेथिति !

हरेक चार बि युक्त कुरा बिचार हुँदैनन्
जसरी हरेक अमिलो, पिरो, नुनिलो र रसिलो कुरा अचार हुँदैनन्
त्यसमाथि पनि नेताले बिचार व्यक्त गर्ने कुरा त झन् असम्भव हुन्छ
मातापिताको मृत्युपछि मात्रै व्यक्ति टुहुरो हुने जस्तै
बिचार शब्दसँग पारपाचुके गरेपछि मात्रै कुनै व्यक्ति नेता हुन्छ ।

बत्तिसपसतली, काठमाडौं