नेपाली हास्यव्यङ्ग्य अनलाइन पत्रिका

सगरमाथा
हिउँको अग्लो सगरमाथा एउटा छ
पत्थरको सगरमाथा कसैलाई देउता छ,
पार्वतीका माइतीमा युद्धका हङ्कीडङ्कीले
मनको सगरमाथामा पीडा र व्यथा छ ।

फरक
यहाँ अशिक्षितभन्दा शिक्षित डरलाग्दा छन्
जसका नाथ छैनन् उनीहरू नै भरलाग्दा छन्
‘पढी गुनी कौनै काम, हलो जोती खायो माम’
बुझ्नेले बिगारी सक्यो, बरु नबुझ्ने नै तरलाग्दा छन् ।

नेपाली सिनेमा

आमा प्रोड्युसर, बाउ डाइरेक्टर
भाइ हिरो, दाइ फाइट मास्टर
बुहारी हिरोइन, भाउजू कोरियोग्राफर,
नेपाली सिनेमा दर्शकलाई झापड ।

काठमाडौँ : एक दृष्टिकोण

काठमाडौँ अकूत कमाउनेलाई ‘लकर’ हो,
‘कुटी ल्यायो भुटी खायो’लाई रहर हो,
गरिब छन् र गरिबीको विज्ञापन गर्छ सहर–
काठमाडौँ जान्नेलाई अमृत, नजान्नेलाई जहर हो ।

मन्थली, रामेछाप