नेपाली हास्यव्यङ्ग्य अनलाइन पत्रिका

आजभोलि यस्तो लाग्छ, चुकेको छ देश मेरो
आफ्नो गौरव बिर्सिएर, झुकेको छ देश मेरो ।

पिता पुर्खा लडे सधैं, अस्तित्वको रक्षा गर्दै
कहाँ पुग्यो गाथा ऐले, लुकेको छ देश मेरो ।

झलमल्ल बस्छन् अरू, हामी बस्छौं अँध्यारोमा
धनी भन्छन् जलश्रोतको, सुकेको छ देश मेरो ।

चोर बस्छन् चौतारीमा, दुख पाउँछ सज्जनले
अशक्त र निमुखामा, भुकेको छ देश मेरो ।

कोही पुगे चन्द्रमामा, कोही पुगे मङ्गलतिर
सबै छोडी कुर्सी मात्रै, ढुकेको छ देश मेरो ।

मिली सके माटो सँगै, सहिदका स्वप्ना सबै
चोखो आत्मा रुँदै रुँदै, थुकेको छ देश मेरो ।

झुक्दैन याँ सगरमाथा, न त झुक्छन् बुद्ध हाम्रा
झुक्नु हुन्न नेपालीले, फुकेको छ देश मेरो ।

पुरानो नैकाप, काठमाडौं
हाल– रोचेस्टर, न्युयोर्क