नेपाली हास्यव्यङ्ग्य अनलाइन पत्रिका

मन्त्री लिलाममा छ
कर्तव्यका दुर्गमा आस्थाका सिपाही नरहेपछि
मयलपोसमा विधायक खरिदका नोट भरिएपछि
जनता नेताको सख्त खिलापमा छ,
किनभने मेरो देशमा मन्त्री पद लिलाममा छ ।

सन्तान
प्रीतिभोजमा आएका पाहुना झैँ हुन् सन्तान
मीठो भए प्रशंसा, नमीठोमा दन्तबझान ।
पखेँटा लागेपछि गुँडमा नफर्कने चराका बच्चा झैँ
बाउआमा कल्पिन्छन्– ‘दुई सन्तान ईश्वरका बरदान ।’

नाता
लोग्नेस्वास्नीको नाता घाँटीको डोरो हो
मन मिलुन्जेल दोहोरो, नत्र एकोहोरो हो ।
चित्त कित्ताकाट नगर दम्पती हो –
त्यसपछिको नाता टाउका माथिको लोहोरो हो ।

प्रेमको बैंक
रूपैयाँको मात्र होइन प्रेमको पनि बैंक हुन्छ
फोटोको के कुरा ? हृदयको पनि फ्रेम हुन्छ ।
यी सबै तन र मन झरिला हुँदाका कुरा हुन्–
आँत मरेपछि र दाँत झरेपछि सबै खङ्ग्रङ्ग हुन्छ ।
मन्थली, रामेछाप