नेपाली हास्यव्यङ्ग्य अनलाइन पत्रिका

यस्तै हो भने यहाँ
के के हुन सक्छ
सायद ब्रह्माण्ड
पल्टन सक्छ
पृथ्वी नघुमेर
बिस्तारै–बिस्तारै रोकिन सक्छ
बीच–बीचमा धाँजा–धाँजा भई
फाट्न र फुट्न सक्छ

यस्तै हो भने
यहाँ महाप्रलय हुन सक्छ
सबै आगो झैं बल्न सक्छ
म पनि जल्न सक्छु
तिमी पनि जल्न सक्छौ
सायद हामी सबै खरानी भई
धूलै धूलोको कणमा
परिणत हुन सक्छौँ ।
पृथ्वी डगमगायो भने साराका सारा
कीट पतङ्ग, बोट बिरूवा
पशु पन्छी, मानिस सबै नै
सखाप हुन सक्छ
संसार मरूभूमिमा
परिणत हुन सक्छ
यहाँ खालि नाङ्गो डाँडा
पाखा अनि पर्वत
सुकेका खोलानाला
र भत्केका पाटी पौवा बाहेक
मठ, मन्दिर, मस्जिद र गुम्बाहरू
सबैको कङ्कालै कङ्काल
लहरा कन्दराहरू
सुकेका पत्कर,
फल्छ धानको साटो भुस
आँखा नदेख्नेले हेर्न मात्र होइन
सुन्न छोड्छ
सक्दैन वाक्य फुटाउन ।

दूध दिइरहेका गाई वस्तुले
दूध नदिन सक्छ
छहरा छाँगाहरू स्थिर हुन सक्छ
भीर पाखा समथर बन्न सक्छ
यस्तै हो भने यहाँ के के हुन सक्छ ।
नबन्नेहरू बन्न सक्छन्
नउठ्नेहरू उठ्न सक्छन्
नबोल्नेहरू मुख खोल्न थाल्छन्
सोझा भनेकाहरू
बाङ्गाटिङ्गा हुन्छन्
राम्रा जति नराम्रा हुन्छन्
यस्तै हो भने यहाँ के के हुन सक्छ ।

हिजोसम्म कुद्नेहरू
आज अपाङ्ग बन्न सक्छ
मै हुँ भन्नेहरू पनि
मुर्दा झैँ ढल्न सक्छ
हेर ! यस्तै हो भने यहाँ
के के हुन सक्छ
उन्यू फुल्न सक्छ
ढुङ्गो टुसाउन सक्छ
यस्तै हो भने यहाँ
के के हुन सक्छ !
काठमाडौं