नेपाली हास्यव्यङ्ग्य अनलाइन पत्रिका

कमरेड बाबुराम भट्टराईको भारत भ्रमणको विधिवत समाप्तिपश्चात प्रत्युत्तरमा उताबाट को आउनेछ भनी जान्न मलाई खुबै उत्सुकता थियो । यो कुनै उच्चस्तरीय भारतीय नेता नै हुनेछ भन्ने पनि लागेको थियो । अथवा नीच स्तरको भए पनि के फरक पर्नेछ ? तर अचम्मैले कुनै नेताको साटो अभिनेताको नेपाल आगमन भयो । अर्थात् भारतीय सिनेहिरो शाहरूख खानको ।

नेपालका कथित ठूला नेताहरू तारनतार भारत भ्रमणमा गइरहन्छन् । र सायद यसको त्वरित बदलामा दुई नम्बरी भारतीय नेताहरू यहाँ आउने गर्छन् । मेरो मतलव भारतका माथिल्ला नेता नेपाल कमै आउँछन् भन्ने हो । तर सन्तोषको कुरो के छ भने यसपटक उच्चस्तरीय अभिनेता आए । -र आएर गई पनि सकेका छन्) । याद रहोस्, शाहरूख खान भारतीय रजतपटका सुपरस्टार हुन् । उनलाई गणतान्त्रिक भारतका जनता प्रेमले \’किङ खान\’ पनि भन्ने गर्छन् । भारतीय सिनेमाका राजा । तर उनी यहाँ सिनेमाको नभएर कुनै भारतीय सामान प्रचार गर्ने सिलसिलामा आएका थिए । सायद जेनसन एन्ड निकोलसन पेन्टको । होइन, नेरोल्याक पेन्टको । यही ब्रान्डको पेन्ट नै हुनुपर्छ । पेन्ट याने रंग । र भारतीय रंगले यहाँ धेरैथोक रंगिएको छ । चाहे राजनीति होस् या अन्य कुनै नीति । जस्तै अर्थनीति । यसको मध्य भागमा एउटा \’न\’ थपे अनर्थनीति हुनेछ । संक्षेपमा अनीति । अहिले अनीति कै अभूतपूर्व चकचकी भइरहेको बेला होइन र ? संयोगले समय पनि होलीको वरपर भएकोले शाहरूख खानको रंगसहितको नेपाल भ्रमणलाई सामयिक नै मान्नुपर्छ । होली रंगहरूका पर्व हो । र होलीको मौसम नभएको समयमा पनि हाम्रा नेताहरू भारतको कालो, निलो, हरियो, पहेँलो, खैरो, गुलाफी आदि रंगले रंगीन तीव्र गतिले भारतको राजधानी नइदिल्ली पुगिरहन्छन् । यसको सबभन्दा ताजा उदाहरण कमरेड बाबुराम भट्टराईको भारत भ्रमण हो । तर उनले केही हतार गरेजस्तो छ । केही समय प्रतीक्षा गरेका भए यतै पनि भारतको रंगले रंगिने सुविधा हुने थियो । कुनै नेताको नभएर भारतीय अभिनेताकै हातबाट रंगिने अवसरको प्राप्ति पनि के नराम्रो हुने थियो !

अभिनेता शाहरूख खान भारतीय कम्पनीको पेन्टको प्रचार सक्याएर फर्किएपछि पक्कै पनि कुनै नेताको पालो आउनेछ भनेको त भारतबाट बाबा रामदेव पो नेपाल आउने भएका छन् । यसो ता बाबा रामदेव पनि कुनै नेता अथवा अभिनेताभन्दा पछि छैनन् । अझ उनको समग्र व्यक्तित्वमा त नेता र अभिनेताको अद्भुत समीक्षण रहेको छ । उनी एक सुपरस्टार बाबा हुन् । उनकै निजी टेलिभिजन च्यानल \’आस्था\’का एकल हिरो । र उनले नै गएको भारतीय महानिर्वाचनमा भारतीय जनता पार्टीलाई विजयी बनाए भन्नेहरू पनि कम्ता छैनन् । त्यसकारण बाबा रामदेव वर्तमान भारतीय प्रधानमन्त्री नरेन्द्र दामोदरदास मोदीका समर्थक हुन् या नरेन्द्र दामोदरदास मोदी बाबा रामदेवका समर्थक हुन्, यसै भन्न गाह्रो छ । मलाई त अभिनेता एवं नेताका संयुक्त रूप बाबा रामदेवले नै अपेक्षाकृत ज्यास्ती आकषिर्त गर्ने गर्छ ।

जे होस्, शाहरूख खान एकमात्र पेन्टको सशरीर विज्ञापनमा नेपाल आएका थिए । तर बाबा रामदेव त पाचक,

ट्याब्लेट, च्यवनप्रास, साबुन, स्याम्पु, तेल, जाम, जेली, दलिया, बेसन, टुथपेष्ट, विस्कुट, सातु, मैदा, गोमूत्र, चिया, चिनी, अचार, नुन, पिठो, टाइलेट क्लिनर, मुरब्बा, मिठाइ, चक्लेट, सर्वत, मेहँदी, फलकोरस, सीडी चक्का, पुस्तक आदि अनेकन सरसामानका गतिशील प्रचारक हुन् । यही सिलसिलामा उनी नेपाल, बर्मा, श्रीलंका, फिजी, मालदिभ्स, भुटान, बंगलादेश, मलेसिया, सिंगापुर, अष्ट्रेलिया, मारिसस, अमेरिका आदि मुलुकका अथक दौडाहा गरिरहन्छन् । यस अतिरिक्त आफ्नो मुख्य कर्म भनिएको योगासनको पनि तत्तत् ठाउँमा मनोरञ्जक प्रदर्शन गर्ने गर्छन् । यसमा श्वासनदेखि सत्तासनसम्म पर्छ । उनले नितान्त मौलिक सत्तासनलाई पनि योगका ताडासन, चक्रासन, मयुरासन, बक्रासन, भुजंगासन, सर्वांगासन, हलासन, हस्तपादासन आदिसँगै समावेश गरेका छन् । यसको ज्वलन्त प्रमाणको रूपमा बाबा रामदेवकै प्रत्यक्ष-अप्रत्यक्ष रेखदेखमा सफलतापूर्वक सत्तासन गरिरहेका भारतीय मोदीहरूलाई हेरे हुन्छ । सम्भवतः यसैले आकषिर्त भएर हाम्रा नेताहरू पनि बाबा रामदेवलाई मान्ने गर्छन् । उनी एक नेतापि्रय बाबा हुन् । केही वर्ष पहिले पनि उनी नेपाल भ्रमणमा आएका थिए । त्यसबखत उनले हाम्रा कतिपय सत्तापक्ष र प्रतिपक्षका नेताहरूलाई टुँडिखेलको खुला स्थानमा योगासनको खासा दीक्षा दिएका थिए । एकपटक फेरि आउने भएका छन् । यस पटकको उनको भ्रमणमा एउटा अन्तर के हुनेछ भने पहिलेका योगाकांक्षी अर्थात् नेपालको सत्तापक्ष हाल प्रतिपक्ष भइसकेका छन् । अब यसलाई उल्ट्याउने प्रतिपक्षीहरूका यौगिक प्रयास हुनेछ । के यससम्बन्धी बाबा रामदेवसँग कुनै नयाँ सत्तासनको प्रवृत्ति नहोला र ? यसका साथसाथै वर्तमान सत्तापक्षको सोच योगको विपरितासन सिक्नमा हुनेछ । उनीहरू कुनै यथास्थितिवादी आसनको अभ्यास गर्न आतुर हुनेछन् । यसको अर्थ के हो भने बाबा रामदेवको नवीन योग सत्तासनबाट हाम्रा दुवै पक्षका नेताहरू अर्थात् सत्तापक्षी र प्रतिपक्षी यथेष्ट लाभ लिन चाहन्छन् । सबै नेताहरूलाई उनको चमत्कारिक योग विद्यामाथि सम्पूर्ण आसा एवं भरोसा रहेको छ ।

अन्त्यमा,

बाबा रामदेव आफूलाई एक गेरुवा वस्त्रधारी अर्धनग्न फकिर भन्ने गर्छन् । यो असत्य होइन । उनी संसारका एकमात्र अर्बपति फकिर हुन् । उनको भारतको एक आध्यात्मिक सहर हरिद्वारस्थित पतञ्जली योगपिठ कम्पनीबाट वर्षेनि अर्बौं अर्ब रुपियाँको कारोबार हुने गर्छ । उनको कारोबारी नीति पनि गजबको रहेको छ । बाबा रामदेव \’स्वदेशी\’ का कट्टर समर्थक हुन् । यसको सोझो अर्थ विदेशी मालसामानको बहिष्कार गर्नुपर्छ भन्ने हो । उनको प्रवचनको मूल स्वर नै \’स्वदेशी सामान खरिद गर\’ मा पूर्णतया आधारित छ । यही स्वदेशी नीति अन्तर्गत उनी पतञ्जली योगपिठका स्याम्पुदेखि पिठोसम्म भारतबाहिर धमाधम पठाउने गर्छन् । नेपालमा पनि बाबा रामदेव मार्का सरसामानहरूका राम्रो खपत छ । अब यस्ता अग्घोर नीतिवान अर्बपति बाबाजीसँगको प्रभावित हुँदैन ? यस्ता मध्ये एकजना म पनि हुँ । मलाई उनको बहुआयामिक बाबागिरी मन पर्छ । त्यसकारण चाँडै नै हुने उनको टुँडिखेलको योग शिविरमा सामेल हुने विचार गरिरहेको छु । हेरौं के हुन्छ ?
कान्तिपुर दैनिक, ०७१ चैत १४