नेपाली हास्यव्यङ्ग्य अनलाइन पत्रिका

हर्के उमेर ढल्के पनि
आफूलाई तन्नेरी ठान्छन्
जताजता तरुणीको भिड
उतैउतै मात्र जान्छन्
एक दिन रङ्गिन टिसर्टमा
पहिरिए प्यान्ट धर्के
मगगाउँदो सेन्ट छर्के
त्यसपछि
मुलबाटोमा आएर
भिडभाडको बस पर्खे ।

उनलाई
सिटमा बस्न मन लाग्दैन
महिला नभाको बसमा
पस्न मन लाग्दैन
त्यसैले आज पनि
ठेलमठेलको बसमा चढे
कता छन् महिला
यसो आँखा गढे
उतै उतै बढे ।

कहिले मोबाइलमा हल्लो गर्दै
कुइनाले घोचे
कहिले घुँडा तेर्साउँदै
टाङमुनि कोचे
कहिले निदाएझैँ गरी
ढलक्क ढल्के
कहिले सुम्सुम्याउँदै तरुणी
छलक्क छल्के ।

बसमा आज
एक महिला परिन् कडा
हर्केलाई गरिन् खडा
नाकमा कुइनो नै कोचिन्
चाकमा सुइरोले घोचिन्
ऐयाआत्थु गर्दै
हर्के बसबाटै भागे
घरमा पुगी हारगुहार मागे
के भयो भन्दा मुख भयो टम्म
कुरो पनि खोलेका छैनन् आजसम्म ।

आज भोलि हर्के,
खाली खाली बस खोज्छन्
सकभर त्यसमा
महिला नभाकै रोज्छन् ।
दाङ, हाल– काठमाडौं