नेपाली हास्यव्यङ्ग्य अनलाइन पत्रिका

जति पछि
उति सुन्दर आउने
हिजो भन्दा आज
झन राम्रा पाउने
अली पछि जन्मेको भए
क्या हुन्थ्यो
सायत क्याटरिनासँगै
ब्या हुन्थ्यो ।

बोडिङमा पढिन्थ्यो
अङ्ग्रेजी फररर बोलिन्थ्यो
राम्रा राम्रा तरुनीलाई
फेसबुकमा याड गरिन्थ्यो
मुखियाकी नातिनिसँग
मजाले च्याट गरिन्थ्यो
झन पछि जन्मेको भए
क्या हुन्थ्यो
सायद साकिरासँगै
ब्या हुन्थ्यो ।

रातो भालेको जस्तो
कपाल पारिन्थ्यो
प्यान्ट तल तल सारिन्थ्यो
लट्ठा र जगल्टा झारिन्थ्यो
झन पछि जन्मेको भए
क्या हुन्थ्यो
माइलीसँग ब्या हुन्थ्यो ।

भिआर एफएन जेट
भटभटे हुइँकाइन्थ्यो
राम्रा राम्रा तरुनीलाई
पछि राखी सुइँकाइन्थ्यो
बिज्ञानले धामाल पछि गर्यो
इश्वर पनि कमाल पछि गर्यो
झन पछि जन्मेको भए
क्या हुन्थ्यो
सायद राखीसँग नै
ब्या हुन्थ्यो ।
दाङ, हाल– काठमाडौं