नेपाली हास्यव्यङ्ग्य अनलाइन पत्रिका

तिमीले अभाव र गरिबीभित्र छिर्नु हुँदैनथ्यो,
दुःख र पीडामा डुबेकालाई थप पिर्नु हुँदैनथ्यो ।
चिचिला, कोपिला र फूलहरूलाई हर्नु हुँदैनथ्यो
ठाउँ न कुठाउँ यस्तो उत्पात् गर्नु हुँदैनथ्यो ।
धर्मात्मी ज्यानहरूलाई अधकल्चो पार्नु हुँदैनथ्यो
राक्षस मनोवृत्तिलाई छाडनु हुँदैनथ्यो ।
यही हो,
तिमीप्रति मेरो नियमापत्ति !
तिमीप्रति मेरो आपत्ति !
ऐतिहासिकतालाई ढाल्नु हुँदैनथ्यो,
निर्दोष झुपडीहरूलाई अचानोमा पार्नु हुँदैनथ्यो,
साझा र चोखो सम्पत्ति मार्नु हुँदैनथ्यो
पापी र अधर्मी संरचनालाई छाड्नु हुँदैनथ्यो ।
यही हो
तिमीप्रति मेरो आपत्ति !
तिमीप्रति मेरो नियमापत्ति !
आँखा र नाकका लम्बे कुरा गर्नेहरूलाई
रङ र धर्ममा राजनीतिको बीज छर्नेहरूलाई
मानवताको पाठ पढायौ
धन्धुकारी आवाजलाई लडायौ
स्वार्थको दलदलमा भासिएको संविधान
हिँडने मार्ग बनायौ !
फाटेका मनहरू जोडेका छौ
दुःखमा पनि आशाका किरण छोडेका छौँ ।
अघोगति भित्रको यो प्रगति
यसमा मेरो सहमति !
रचनाकाल– २६ जेठ, २०७२