नेपाली हास्यव्यङ्ग्य अनलाइन पत्रिका

आउनुहोस् हजुर आउनुहोस्
मुखै नधोएको भए पनि
यसो नजर लाउनुहोस्
ताजा पत्रिका ल्याको छु
भर्खर पोको खोल्न भ्याको छु
मजा लिई लिई पढ्नुहोस्
बस्ने ठाउँ छैन भने
उभ्भी उभ्भी पढ्नुहोस्
खुट्टा दुखे भने
घुमी घुमी पढ्नुहोस्
भँगेराले चारो खाको जस्तो
झुम्मी झुम्मी पढ्नुहोस् ।

दैनिकी पढ्नुहोस्
साप्ताहिक पढ्नुहोस्
फुर्सद छ भने त
मासिक पनि पढ्नुहोस्
समाचार मात्र कति पढ्ने
फेसन पेजतिर बढ्नुहोस्
आज क्याटरिनाको अर्धनग्न फोटो छ
साकिराको झन पूर्ण कदमै छ
सन्नीको झन सनसनी पूर्ण छ
कति पत्रिका त
घरमा लान पनि गाह्रो होला
मन परेको छ भने
यतै मन अघाउन्जेल पढनुहोस्
कतै जागिरको वान्टेड छ कि
कतै लोक सेवाको सूचना छ कि
निर्धक्कसँग पढ्नुहोस्
पढेको पैसे लिने छैन म
सित्तैमा पढ्नुहोस् ।

बिच्छाएको पढ्नुहोस्
झुन्डाएको पढनुहोस्
तानी तानी पढ्नुहोस्
छानी छानी पढ्नुहोस्
थुपारेको पढ्नुहोस्
फर्काउनलाई उबारेको पढ्नुहोस्
जसरी हुन्छ पढ्नुहोस्
कसरी हुन्छ अगाडि बढ्नुहोस् ।

सकिन्छ भने
मेरो पसलबाट
दुईचार किलो आलु लानु होला
नभए एक दुई किलो
पिँडालु लानु होला
भएन भने
दुई चार खिल्ली
चुरोट किनिदिनु होला
त्यो पनि सकिएन भने
सिँत्तैमा पत्रिका पढ्ने
गोफ्ले दाइको पत्रिका पसल
भनेर चिनिदिनु होला ।
दाङ, हाल– काठमाडौं