नेपाली हास्यव्यङ्ग्य अनलाइन पत्रिका

फोन गर्यो भने
खाली कुरा मात्र तन्काउने
चाहिने नचाहिने कुराले
कन्चटै रन्काउने
त्यसैले फोन गर्ने भन्दा
एसएमएस गर्ने गर्याथेँ
बताउँछु तपाईंलाई साथी
एसएमएस गर्दा
कस्तो कस्तो फन्दामा पर्याथेँ
एउटा कुरा लेख्छु भन्छु
आर्को कुरो भएर जान्छ
थाह छैन एसएमएस पाउनेले
कस्तो कस्तो ठान्छ ।

एक दिन हाकिमलाई
मेरा कुरा पनि सुन
भनी पठाको त
मोरा कुरा पनि सुन
भनी गाको छ
गाली गर्यो भनेर हाकिमसँग
त्यस दिनदेखि
बोलचालै बन्द भाको छ ।

अर्को साथीलाई
तिम्रो सालीलाई चिन्या छु भनी पठाको त
तिम्री स्वास्नीलाई किन्या छु भनी गएछ
साथीलाई त भेटेको छैन
तर सुनेको
त्यो मेसेजले त
उनीहरूको डिभोर्सै भएछ ।

एक पटक
एउटीलाई आइ लब यु भनी पठाको त
अर्कीको बाउको नम्बरमा गाको छ
कसरी भनुँ त्यसपछि के के भाको छ
उसको बाउले घरमै आई
भकुर्नसम्म भकुरो
लुच्चा लफङ्गा डाँका भन्दै
डकार्नुसम्म डकारो ।

आज भोलि फेरि
एसएमएस भन्दा
फोनै गर्ने गर्या छु
एसएमएस पठाउँदा पनि
एक पटक पुनश्च हेर्ने गर्या छु ।
दाङ, हाल– काठमाडौं