नेपाली हास्यव्यङ्ग्य अनलाइन पत्रिका

काट् बाबु काट्
कलमले काट्
डटेपनले काट्
सिसा कलमले काट्
जसरी पनि काट्
तैँले मात्र भ्याइनस् भने
भाइलाई पनि बाँड् ।
भोलि कापी बुझाउनु छ
बरु बहिनीलाई पनि बाँड् ।

तँलाई र भाइलाई
हाफ प्यान्ट सर्ट किन्दिम्ला
बहिनीलाई पनि
मिनी स्कर्ट सिदिम्ला
कलेज जान नसके पनि
जाँचकी हुन पाछस्
जागिर नभए पनि
घरमा बसी बसी खाछस्
काट् छोरा काट्
हँसियाले झै काट्
कटारीले झै काट्
साँझसम्म सक्नुपर्छ
तैँले मात्र सक्दैनस् भने
काकीलाई पनि बाँड् ।

पहिले
राम्रा राम्रा अक्षरवाला एकातिर
पछि नराम्रा जति सबै अर्कातिर छाँट्
कसले कति लेखेको छ
बित्ताले नापीनापी काट्
धेरै लेखेको भए धेरै
थोरै लेखेको भए थोरै
जसरी पनि सक्नुपर्छ बोरै
गर्मीले पाक्या भए कोक खा
थाक्या भए अरु थोक खा
मेरो त आज पनि सेमिनार छ
काट् छोरा काट
बरु एक्लै सक्तैनस् भने
साथीलाई समेत बाँड् ।

पुर्पुरोमा लेखेको भए पास होलान्
नत्र तँ जस्तै फेल होलान्
सरकारले न जागिर दिने
बिरोजगारको न भत्ता दिने
खाली धर्ना दिनेलाई
टियुले कति भर्ना लिने ?
परीक्षार्थीले कापी पाउँदैन
रिटोटल गरे यो भन्दा धेरै आउँदैन
पुरपुरो त लेखेरै आ’छस्
बाह्र पास नगरे पनि
बिएको कापी काट्न पाछस्
काट् छोरा काट्
एक्लै सक्दैनस् भने
पल्नो कोठामा बस्ने अन्टीलाई बाँड्
तल्लो कोठामा बस्ने घन्टीलाई बाँड्
भोलि त कापी बुझाउनु छ
साँझसम्म जसरी हुन्छ काट ।
दाङ, हाल– काठमाडौं