बूँद रानागजल लेख्नु छ
जति सुन्यो मिठो लाग्ने गजल लेख्नु छ
रक्सी भन्दा छिटो लाग्ने गजल लेख्नु छ
असरदार कस्तो भने यल्ले छोएमा
ढुङ्गा मुढा पिठो लाग्ने गजल लेख्नु छ ।
संसारका जे जतिछन् सारा मुद्दामा
गज्जबको भिटो लाग्ने गजल लेख्नु छ ।
नक्कल नै गर्नु परे किन अरूको
गालीबकै डिटो लाग्ने गजल लेख्नु छ ।
स्वाद सबै फिका लागुन् यसका अगाडि
स्याउ खाँदा गिठो लाग्ने गजल लेख्नु छ ।
भर्खरै त सत्तरीको भइयो भनौं न
सय नाघ्दा ठिटो लाग्ने गजल लेख्नु छ ।
Subscribe
Login
0 Comments
Oldest
