नेपाली हास्यव्यङ्ग्य अनलाइन पत्रिका

न त धेरै पढ्न पर्ने न केही काम गर्न पर्ने
ठुला कुरा गरे हुन्छ,न सहिद झैं मर्न पर्ने
म आफ्नो मात्रै कुरा गर्छु,अरु बोले कान थुन्छु
चिन्ता नगर बा आमाले यही गुणले म नेता हुन्छु ।

म भित्र त खाँदमखाँद भरिएको छ स्वार्थीपना
अरुलाइ त भनेकै छु लड साथी निस्वार्थी बन
मै हूँ भन्नेलाइ नि थाहै हुन्न,म कस्तो जाल बुन्छु
चिन्ता नगर बा आमाले यही गुणले म नेता हुन्छु ।

लाखौंको कुरै नगर,करोडौं झ्वाम पार्न सक्छु
खेलाडी म कस्तो भने,बोलेरै जित्न हार्न सक्छु
त्यसैले त डाँकाहरूले मलाइ राम्रो भन्नछन् रे सुन्छु
चिन्ता नगर बा आमाले यही गुणले म नेता हुन्छु ।

आफ्नो स्वार्थ पर्छ भने म जति तल नि झर्न सक्छु
भोट माग्नलाइ देशभक्तको अभिनय नि गर्न सक्छु
हाँस्नेहरूको सामु हाँस्छु, रुनेहरूको सामु रुन्छु
चिन्ता नगर बा आमाले यही गुणले म नेता हुन्छु।

कुर्ची मैले पाम न मात्रै, जुको जस्तै टाँसिने छु
टिकाउन सत्तालाइ विरोधीसँग नि गाँसिने छु
मलाइ माथी लान्छन् भने बिदेशीको नि पाऊ छुन्छु
चिन्ता नगर बा आमाले यही गुणले म नेता हुन्छु ।
लाहाचोक– ५, पोखरा, कास्की
हाल : दोहा, कतार